Nəsib Məhəməliyev: “Böyük Vətən Müharibəsində olduğu kimi, bu cəbhədə də milli birlik, hər bir vətəndaşın şəxsi məsuliyyəti nəticəsində qalib gəlmək mümkündür”

Bütün dünyada olduğu kimi, ölkəmizdə də koronavirusa qarşı mübarizə davam edir. Yoluxma və ölüm sayının sürətlə artdığını, koronavirusa qarşı mübarizəyə böyük qüvvə və enerji sərf edildiyini, problemdən xilas olmağın yalnız bütün xalqın birliyi, səyi və fədakarlığı nəticəsində mümkün olduğunu nəzərə alsaq, bu mübarizəni Qarabağ müharibəsindən sonra xalqımızın qarşısında duran ən başlıca sınaq – mahiyyət etibarı ilə yeni bir müharibə kimi xarakterizə etmək mümkündürmü? Koronavirusla qarşı mübarizədə qalib gəlmək üçün Vətən Müharubəsindəki birlik və prinsipiallığın, qətiyyət və iradənin bu mübarizədə də sərgilənməsi nə dərəcədə önəmlidir?

Moderator.az-a açıqlama verən millət vəkili Nəsib Məhəməliyev, koronavirusa qarşı mübarizədə birlik və prinsipiallığın zəruri olduğunu bildirdi:

“Düşmən üzərində qələbəni şərtləndirən ən vacib məsələlərdən biri milli birlikdir. Tale belə gətirdi ki, 2020-ci ildə Azərbaycan xalqı iki cəbhədə düşmənlə üz-üzə qalmalı oldu. İlin əvvəlindən başlanmış Pandemiyanın birinci mərhələsini, ölkə rəhbərliyinin gördüyü qabaqlayıcı tədbirlər nəticəsində uğurla, minimum itkilərlə başa vurduq. Bir çox ölkələrə nümunə ola biləcək, beynəlxalq humanitar missiya çərçivəsində imkansız dövlətlərə yardımlar göstərildi. Yeri gəlmişkən, Qoşulmama Hərəkatına daxil olan ölkələriin timsalında, bu xeyirxahlığın müsbət nəticələrini BMT TŞ-da Azərbaycanla bağlı yeni qətnamənin qəbul edilməməsi zamanı gördük. İkinci cəbhə isə, ermənilərin 30 il ərzində işğalda saxladığı torpaqların azad edilməsi ilə bağlı, xalqımızın apardığı ədalət müharibəsidir. Təbii ki, müharibə itkisiz olmur. Şəhidlərin dəfn mərasimləri, rayonlarımızın azad olunması, çoxsaylı kütləvi tədbirlərlə müşaiyyət olundu. Ələlxüsus, 44 günlük ağır döyüşlərdən sonra xalqımız tarixi qələbə qazandı. Milyonlarla insan koronovirusu unudaraq küçələrə axışdı. Sosial məsafə, qoruyucu maska, şəxsi gigiyena məsələləri arxa plana keçdi. Nəticədə, Covid-19 sürətlə yayılmağa başladı və gündəlik artım 4 min civarını aşdı. Gündəlik bu qədər insanın yoluxması və onların başqaları ilə təmasları, koronovirusun daha da sürətlə yayılmasına səbəb olur. Qeyd etmək istərdim ki, belə bir artım tək bizdə yox, dünyanın əksər ölkələrində baş verir. Artıq dünyada 62 milyondan çox insan bu virusa yoluxmuş, 1,5 milyona yaxını vəfat etmişdir. Çox təəssüflər olsun ki, hələ də bir çox vətəndaşlarımız kifayət qədər məsuliyyətli davranmır. Dəyərli insanlarımızı itiririk. Covid-19 dünyanın tam əksər ölkələri tərəfindən insanlıq əleyhinə müharibə kimi qəbul olunub.

Ermənistan üzərində şərəfli qələbədən sonra, xalqımızın qarşısında duran ən vacib məsələ, koronavirusla mübarizədir. Yalnız Böyük Vətən Müharibəsində olduğu kimi, bu cəbhədə də milli birlik, hər bir vətəndaşın şəxsi məsuliyyəti nəticəsində qalib gəlmək mümkündür. Bir məsələni də unutmamalıyıq. Hal-hazırda müharibədə yaralanmış xeyli sayda yaralılarımız var. Həkimlərimiz, tibb personalı əsasən onların müalicəsi ilə məşğul olmalıdır. Səhiyyə sistemini də həddindən artıq yükləməməli, dövləti izafi xərclərə salmamalıyıq. Xalq olaraq, qətiyyət və iradə nümayiş etdirərək, pandemiyanın nəzarətdən çıxmasına yol verməməliyik”.