22 İyul – Milli Mətbuat Günü münasibətilə keçirilən tədbirdə Balakən Rayon İcra Hakimiyyətinin başçısı Natiq Ağayev ziyalıları, ictimai fəalları və müxtəlif kütləvi informasiya vasitələrinin nümayəndələri iştirak ediblər.

Balaken.info xəbər verir ki, tədbirdə çıxış edən Balakən Rayon İcra Hakimiyyətinin başçısı Natiq Ağayev Azərbaycan milli mətbuatının şərəfli inkişaf yolundan bəhs edərək milli mətbuat xalqımızın ictimai fikir tarixində mühüm rol oynamaqla yanaşı, cəmiyyətin maariflənməsinə, milli-mənəvi dəyərlərimizin təbliğinə, dövlətçilik ənənələrinin möhkəmləndirilməsinə və milli maraqların qorunmasına əhəmiyyətli xidmət göstərdiyini bildirib. 

Rayon rəhbəri çıxışında media nümayəndələrinin Balakən rayonunun ictimai-siyasi, sosial-iqtisadi və mədəni həyatında baş verən yeniliklərin, həyata keçirilən abadlıq-quruculuq işlərinin, dövlət proqramlarından irəli gələn tədbirlərin və digər mühüm layihələrin operativ, obyektiv və peşəkar şəkildə ictimaiyyətə çatdırılmasındakı fəaliyyətini yüksək qiymətləndirərək jurnalistlər cəmiyyətlə dövlət arasında etibarlı informasiya körpüsü rolunu uğurla yerinə yetirərək ictimai rəyin formalaşmasına mühüm töhfə verdiyini qeyd etdi.

Tədbirdə çıxış edən media nümayəndələri onlara göstərilən diqqət və qayğıya, eləcə də rayon İcra Hakimiyyəti ilə formalaşmış səmərəli əməkdaşlıq mühitinə görə minnətdarlıqlarını ifadə ediblər.

Tədbir iştirakçıların birgə xatirə şəkli çəkdirməsi ilə başa çatıb və görüş xoş təəssüratlarla yadda qalıb.

Şahidi olduğunuz hadisələri çəkib bizə göndərin! 7/24 whatsapp